うちなあぐち日記

うちなあぐちえ 聴ち美らさ 語い美らさ 書ち美らさ

2018年09月

 安室奈美恵ぬ引(ふぃ)ちなゆんでぃち、沖縄(うちなあ)はじみ、日本国中、大(うう)むさげえいそおいびいたん。
 
 なあ、何年前(あんにんめえ)ぬ子供ぬ日(ふぃい)がたびいらあ、子(くゎ)ん達(ちゃあ)、添(そう)てい、玉泉洞んかい、遊(あし)いが行(い)ちゃびたん。前(めえ)かにてぃ、沖縄アクターズスクールぬ生徒(しいとぅ)ん達ぬ見世物(みしむん)ぬあんでぃぬ音(うとぅ)ぬ聞(ち)かりとおいびいたん。
 安室奈美恵え、うぬばすから、名(なあ)ぬあいびたん。うぬ日や、船(ふに)んかい擬(に)してえる舞台(ばんく)ぬ上(ゐ)んじ、アクタースクールぬ生徒ん達ぬ「ピーターパン」ぬ芝居(しばい)そおいびいたん。あんし、当(あ)た前(めえ)、安室奈美恵え、ピーターパン役(やく)そおいびいたん。
 胴(どぅう)ぬ成(な)いふじ、振(ふ)い回(ま)あし、歯切(はじ)ぬちびらさい、声(くぃい)ん、ばちらあさいびいたん。

 安室奈美加那志、今からあゆうゆうとぅ、くたんでぃ治(のお)し、しんそうり。長(なげ)えさ、にふぇえでえびたん。

【語句】
ピーターパン安室奈美恵ぬ覚え=ピーターパン安室奈美恵ぬ想い出
安室奈美恵ぬ引ちなゆんでぃち、沖縄はじみ=安室奈美恵が引退するとして、沖縄はじめ
日本国中、大むさげえそおいびいん=国中が大騒ぎしています。非丁寧文「~大むさげえいそおん」。
なあ、何年前ぬ子供ぬ日がたびいらあ=もう何年前の子供の日のことだったでしょうか。非丁寧文「~がやたら」。
子ん達、添てい、玉泉洞んかい、遊いが行ちゃびたん=子供を連れて玉泉洞に遊びにいきました。非丁寧文「~行(ん)じゃん」。
前かにてぃ、沖縄アクターズスクールぬ生徒ん達ぬ見世物ぬ=事前に沖縄アクターズスクールの生徒達によるショウが
あんでぃぬ音ぬ聞かりとおいびいたん=あるとの宣伝に接していました。非丁寧文「~聞かりとおたん」。
安室奈美恵え、うぬばすから、名ぬあいびたん=安室奈美恵はその頃から有名でした。非丁寧文「~名ぬあたん」。
うぬ日や、船んかい擬してえる舞台ぬ上んじ=Zその日は船に擬した舞台の上で、
アクタースクールぬ生徒ん達ぬ=アクターズスクールの生徒達が
「ピーターパン」ぬ芝居そおいびいたん=「ピーターパン」の劇をしていました。非丁寧文「~芝居そおたん」。
あんし、当た前、安室奈美恵え、ピーターパン役そおいびいたん=そう、当然、安室はピーターパン役でした。非丁寧文「~役そおたん」。
胴ぬ成いふじ、振い回あし、歯切ぬちびらさい=体様、身のこなしがきびきびしているし、
声ん、ばちらあさいびいたん=声も透き通っていました。非丁寧文「~ばちらあさたん」。
安室奈美加那志、今からあゆうゆうとぅ=安室奈美恵さん、これからはのんびりと、
くたんでぃ治し、しんそうり=疲れを癒してください。非丁寧文「~治し、し取らし」。
長えさ、にふぇえでえびたん=長い間、ありがとうございました。

 ヤマトお今度(くんど)お、うゎあちちん、禍(わざ、わざゑえ、わざれえ)ん、違(ちが)とおいびいん。
 ふしがらんあたい暑(あち)さがやあんでぃ、思(うみ)いねえ、雨(あみ)え山切(やまち)り降(ぶ)いさあに、大水(ううみじ)ぬ溢(あ)んでぃてぃ、家(やあ)ん道路(みち)までぃ、流(なが)さりやびいん。
 片付(かたじ)きゆしぬ遂(とぅ)ずまらんうちなかい、台風(てえふう)や、幾(いく)ちん、来(ち)ゃあびたん。台風21号ぐれえぬ風(かじ)ぬ強(つう)さあ、沖縄(うちなあ)んじえ、来(ち)見(ん)ちゃる如(ぐとぅ)どぅあいびいしが、ヤマトゥ於(をぅ)とおてえ、強当(ちゅうあ)たいそおいぎさいびいん。タンカー船(ぶに)え、流さりゆい、橋(はし)んかい突(ち)ち当たやあい、関西空港ん使(ちか)あらんなとおる風儀(ふうじ)やいびいん。

あんし、また、今日(ちゅう)や、北海道んかいねえぬ揺(ゆ)やあい、うすまさ、害(きが)そおんでぃぬ事(くとぅ)やいびいん。
 
 自然(しじん)ぬ災(わざ、わざれえ、わざゑえ)や、都市(まち)ぬ備(すな)わいぬ上勝(うゑいまさ)いねえ、上勝るさく、強当たいするむんがやいびいら。
 くりん温世(ぬくゆう)ぬ慣(なれ)がやびいら。

【語句】
山切り降い、台風、ねえ=豪雨、台風、地震
ヤマトお今度お、うゎあちちん、禍ん、違とおいびいん=本土は今年は天候も災害も異常です。非丁寧文「~違とおん」。
ふしがらんあたい暑さがやあんでぃ、思いねえ=どうしようもないぐらい暑いかと思えば、
雨え山切り降いさあに、大水ぬ溢んでぃてぃ=豪雨で洪水になって、
家ん道路までぃん、流さりやびいん=家屋も道路も流されます。非丁寧文「~流さったん」。
片付きゆしぬ遂ずまらんうちなかい=片付けも終わらないうちに
台風や、幾ちん、来ゃあびたん=台風は何個もきました。非丁寧文「~来ゃん」。
台風21号ぐれえぬ風ぬ強さあ、沖縄んじえ=台風2号程度の風の強さは沖縄では、
来見ちゃる如どぅあいびいしが、ヤマトゥ於とおてえ=経験済みですが、本土においては、
強当たいそおいぎさいびいん=打撃が大きいようです。非丁寧文「~そおいぎさん」。
タンカー船え、流さりゆい、橋んかい突ち当たやあい=タンカー船は流されるし、橋に衝突して、
関西空港ん使あらんなとおる風儀やいびいん=関空は使用できなくなっているようです。非丁寧文「~風儀やん」。
あんし、また、今日や、北海道んかいねえぬ揺やあい=そして今日は北海道では地震が起きて、 註:「地震が起きる」ことを「ねえぬ揺ゆん」と言いますが、「ねえ」は「地震」の意味で「ねえぬ揺れゆん」では「震」と「揺」の二重表現になります。しかし、広辞苑では「ねえ」に対応する「ない」は元々「地」からぼの転で、日本語でも「ないが揺(よ)りば」とに慣用的語句になっています。
うすまさ、害そおんでぃぬ事やいびいん=ひどく被害を受けたようです。非丁寧文「~事やん」。
自然ぬ災や、都市ぬ備わいぬ上勝いねえ、上勝るさく=自然の災害は都市機能が発達すればするほど、
強当たいするむんがやいびいら=被害は大きくなるのでしょうか。非丁寧文「~むんがやら」。
くりん温世ぬ慣がやびいら=これも温暖化の「常」なのでしょうか。非丁寧文「~慣がやら」。


追記/注:「山切り降い」について「山を切るほどの雨が降る」という意味で解釈する人もいるようですので、説明させていただきます。
 「山切り」とは「山切りゆん」(無秩序になる、むちゃくちゃである、乱暴である、野蛮的である、等の意味)の名詞形です。「山切り」は当て字で、日本語の「山切り」の意味は全くありません。「やま」は元々、「野生、野蛮、未開、野暮」等の意味です。「やままやあ」=「野良猫」、「やまん組(ぐう)」=「やんちゃな者」、「やま猫(ねこ)」=「(イリオモテヤマネコ等の)野生猫」、「やま学校」=「家からは出たものの登校せずに周辺でサボること」の意味。日本語の「山」の意味にも使われることおあります。

 「糞喰(くすくぇ)え」んでえ、悪(や)な言葉(くとぅば)やいびいしが、鼻放(はなふぃ)ゆる拍子(ひょうし)ねえ、いいくる言(い)やびいん。
 鼻放いねえ、悪な物(むん)ぬ胴(どぅう)んかい入(い)っち来(ち)ゅうんでぃち、思(うま)あらっといびいくとぅ、鼻放ちゃる人(ちゅ)くるぬ、うぬ悪な物、呪(ぬら)たい、悪な口(ぐち)さいするばすやいびいん。

 やいびいしが、今日朝(ちゅうあさ)ぬNHK見(ん)ちょおいびいたれえ、鼻放ゆる人んかい、別(びち)ぬ人ぬ、うぬ言葉、言ちょおいびいたん。

 んちゃ、所(とぅくる)にゆてぃ、大概(てえげえ)なあや、慣(な)り風儀(ふうじ)ぬ変(か)わゆるむのおやいびいしが、鼻放ゆる人んかい、「糞喰え」んでぃ言る慣りいぬあんでえ、今(なあ)だ如(ぐとぅ)、聞(ち)ちぇえ見(な)あびらん。

 「糞喰え」んでぃ言ちゃる人んかい別ぬ人ぬ、てえふぁあ物言(むに)いさあに「儲(もう)き、てぃ米(めえ)、喰え」んでぃ言る事(くと)ぐれえやあしびいしが…。

【語句】
「糞喰え」んでえ、悪な言葉やいびいしが=「糞喰らえ」とは品のないことばですが、非丁寧文「~言葉やしが」。
鼻放ゆる拍子ねえ、いいくる言やびいん=くしゃみするタイミングでは言います。非丁寧文「~言ん」。
鼻放いねえ、悪な物ぬ胴んかい入っち来ゅうんでぃち=くしゃみをすると、魔物が体内に入ると、
思あらっといびいくとぅ、鼻放ちゃる人くるぬ=考えられているので、くしゃみする本人自身が、
うぬ悪な物、呪たい、悪な口さいするばすやいびいん=その魔物を叱ったり、悪口を叩いたりするです。非丁寧文「~ばすやん」。
やいびいしが、今日朝ぬNHK見ちょおいびいたれえ=ですが、今朝NHK番組をみれいましたら、非丁寧文「~見ちょおたれえ」。
鼻放ゆる人んかい、別ぬ人ぬ、うぬ言葉、言ちょおいびいたん=くしゃみする人に他人がそのマジナイを言っていました。非丁寧文「~言ちょおたん」。
んちゃ、所にゆてぃ、大概なあや、慣り風儀ぬ変わゆるむのおやいびいしが=確かに地域によって少しは習慣が異なるものでありますが、非丁寧文「~むぬおやしが」。
鼻放ゆる人んかい、「糞喰え」んでぃ言る慣りいぬあんでえ=くしゃみする人に(そこにいる他人が)「糞喰らえ」という習慣があるとは、
今だ如、聞ちぇえ見あびらん=いまだかって、耳にしたことがありません。非丁寧文「~見だん」。
「糞喰え」んでぃ言ちゃる人んかい別ぬ人ぬ=「糞喰らえ」と言った人に他人が、
てえふぁ物言いさあに、「儲きてぃ米、喰え」んでぃ=冗談で「儲けて米を食べよ」と、
言る事ぐれえやあしびいしが…=言うことぐらいはありますけど…。非丁寧文「~あしが」。

↑このページのトップヘ