うちなあぐち日記

うちなあぐちえ 聴ち美らさ 語い美らさ 書ち美らさ

2018年07月

 本土(やまと)お、ふしがらんたいぬ暑(あち)さやんでぃぬ事(くとぅ)やいびいん。
 雨(あみ)ぬ降(ふ)いねえ、あむとぅ洗(あれ)え流(なが)するあたいぬ大水(うふみじ)んかいなゆい、晴(は)りいねえ、人(ちゅ)ぬ死(し)ぬるあたい暑さんでぃぬ事やいびいん。
 アスファルトん溶(とぅう)きゆるあたい暑さる国(くに)んあんでぃぬ事やいびいん。

 「温暖化」(ぬくばあっとおん)んでぃ言(ゆ)しやか、「滾(たじ)い熱さ」んでぃぬ言葉(くとぅば)ぬどぅ、似合(のお)とおいびいる。
 
 沖縄(うちなあ)や、なあだましどぅやるんでぃち、言(い)らっとおる風儀(ふうじ)やいびいしが、太陽(てぃだ、てぃいだ)とぅ湿気(しみち)ぬ強(ちゅう)さあ、ふぃしがりやびらん。

 今頃(なまぐる)ぬ節(しち)え、大暑(ううあちさ)んでぃ言(い)やびいしが、実(じゅん)に当(あ)たとおんでぃ思(うみ)やびいん。

 御(ぐ)すうようん、夏負(なちま)きさんぐうとぅう、たんきみそおり。

【語句】
本土お、ふしがらんたいぬ暑さやんでぃぬ事やいびいん=本土はひどい暑さのようです。非丁寧文「~事やん」。
雨ぬ降いねえ、あむとぅ洗え流するあたいぬ大水んかいなゆい=雨が降れば土手を流すほどの洪水になるし、
晴いねえ、人ぬ死ぬるあたい暑さんでぃぬ事やいびいん=天気になれば人が死ぬほどの暑さだとのことです。非丁寧文「~事やん」。
アスファルトん溶きゆるあたい暑さる国んあんでぃぬ事やいびいん=アスファルトが溶けるほど暑い国もあるとのことです。非丁寧文「~事やん」。
「温暖化」んでぃ言しやか、「滾い熱さ」んでぃぬ=「温暖化」というより、「煮え滾る熱さ」という
言葉ぬどぅ、似合とおいびいる=言葉こそ相応しいです。非丁寧文「~似合とおる」。
沖縄や、なあだましどぅやるんでぃち言らっとおる風儀やいびいしが=沖縄はまだ良い方であると言われてようですが、非丁寧文「~風儀やしが」。
太陽とぅ湿気ぬ強さあ、ふしがりやびらん=日光と湿気の強いさは、どうしようもありません。非丁寧文「~ふしがらん」。
今頃ぬ節え、大暑んでぃ言やびいしが='今頃の季節は大暑と言いますが、非丁寧文「~言しが」。
実に当たとおんでぃ思やびいん=ほんとうに当たっていると思います。非丁寧文「~思ゆん」。
御すうようん、夏負きさんぐうとぅう、たんきみそおり=皆さま方も夏バテしないよう、お気をつけくださいませ。非敬語文「~たんきり」。

 小満芒種(しゅうまんぼうしゅう)ぬばあや、干上いがなとおらあんでぃ思(うま)ありいるあたい、雨(あみ)ぐふぁたるむんぬ、台風(てふう)7号ぬ後(あと)お、厭々(んばんば)するか、ふぃっちい雨びけん降(ふ)てぃ、ふしがりやびらん。
 気温(ちう)ぬん上(あ)がらな、夜(ゆる)お、クーラーかきらんてぃん、寝(に)んだりいるあたいやいびいん。また、夜中(ゆなか)ぬ風(かじ)ばあばあん、ライオンんでえぬ鳴(な)ち声(ぐぃい)ねえし、台風前(てえふうめえ)ぬ如(ぐとぅ)どぅあいびいる。
 うゎあっちちんでぃ言(ゆ)しえ、実(じゅん)に、悪ちゃくとお同(い)ぬむんやいびいさ。

 気象庁ぬ「梅雨入り宣言」しちゃるなあ明日(あちゃ)からあ、梅雨明け宣言」ぬん、しいかんてぃいそおたる筈(はじ)やいびいん。
 「台風一過」んでぃゆる言葉(くとぅば)ん死(し)に言葉がなとおいびいらあ。前(めえ)や、台風ぬ去(は)いねえ、うち晴りいどぅさびたしが、今(く)ぬ頃(ぐる)んしいや、今(なま)ぬ如(ぐとぅ)し、毎(めえ)が毎日(めえにち)、朝(あさ)ん夕(ゆ)さん、ちゃあ降いそおる事(くと)お、なあだ如やいびいん。雨雲(あみぐむ)お、台風7号以来(ええい)、ちゃあ、覆(うす)いそおいびいしが、何雲(ぬうぐむ)んでぃ言(い)れえ済(し)まびいが。

【語句】
干上(ひゃあ)いとぅ雨=旱魃と雨 「ひゃあい」は「さあい」とも言います。
小満芒種ぬばあや、干上いがなとおらあんでぃ=梅雨の時は旱魃なのかと
思ありいるあたい、雨ぐふぁたるむんぬ=思われるほど、雨がふらなくなっていたのに、
台風7号ぬ後お、厭々するか、ふぃっちい雨びけん降てぃ=台風7号の後は、厭というほど、雨ばかり降って、
ふしがりやびらん=どうしようもありません。非丁寧文「ふしがらん」。
気温ぬん上がらな、夜お、クーラーかきらんてぃん=気温も上がらず、夜はクーラーをかけなくても、
寝んだりいるあたいやいびいん=眠れるほどです。非丁寧文「~あたいやん」。
また、夜中ぬ風ばあばあん、ライオンんでえぬ鳴ち声ねえし=また夜中の強風もライオンの吠えるようで、
台風前ぬ如どぅあいびいる=台風のようです。非丁寧文「~如どぅある」。
うゎあっちちんでぃ言しえ、実に、悪ちゃくとお同ぬむんやいびいさ=天気というものは本当に悪戯をしているようですよ。非丁寧文「~同ぬむんやさ」。
気象庁ぬ「梅雨入り宣言」しちゃるなあ明日からあ=気象庁が梅雨入り宣言した翌日からは
梅雨明け宣言」ぬん、しいかんてぃいそおたる筈やいびいん=梅雨明け宣言もやりづらかったでしょう。非丁寧文「~筈やん」。
「台風一過」んでぃゆる言葉ん死に言葉がなとおいびいらあ=台風一過という言葉も死語になっているのでしょうか。非丁寧文「~なとおらあ」。
前や、台風ぬ去いねえ、うち晴りいどぅさびたしが=以前は台風がされば、カラっと晴れたものですが、非丁寧文「~晴りいどぅさしが」。
今ぬ頃んしいや、今ぬ如し、毎が毎日=近頃は今のように、毎日というほど、
朝ん夕さん、ちゃあ降いそおる事お=朝夕、降り続けえいる事は、
なあだ如やいびいん=いまだかってないことです。非丁寧文「~如やん」。
雨雲お、台風7号以来、ちゃあ、覆いそおいびいしが=雨雲は台風7号以来、ずっとかかりっぱなしですが、非丁寧文「~覆いそおしが」。
何雲んでぃ言れえ済まびいが=(この雲は)何雲と呼べばよいのでしょうか。非丁寧文「~済むが」。

↑このページのトップヘ