うちなあぐち日記

うちなあぐちえ 聴ち美らさ 語い美らさ 書ち美らさ

2015年11月

 本土(やまとぅ)んじ、6歳(むうち)ないる糖尿病ぬ男(ゐきが)ん子(ぐぁ)ぬ、祈祷師なかい、インシュリン打(う)ちゅし、止(や)みらっさたあなかい、けえ亡(まあ)する一件(いっちん)ぬあたんでぃぬ事(くとぅ)やいびいん。
 
 沖縄(うちなあ)んじん、病(やんめえ)、怪我(ぎが)そおなむぬお、「御願不足(うぐぁんぶすく)」故(ゆい)やんでぃち、ユタ買(こ)おいが行(い)ちゅる人(ちゅ)ぬ、今(なま)ちきてぃ、居(をぅ)せえ居いびいしが、とおないねえ、如何(いかな)なユタ信(しん)じやあやてぃん、自(どぅう)くる考(かんげ)えさあに、医者ぬ傍(はた)んかい行(い)ちゅねえする習(なれ)えぬあいびいん。

 「ユタ半分医者半分」でぃゆる習(なれ)えや、いふぇえ、救(すく)いとぅなとおむぬやいびいん。

 何(ぬう)が何(ぬう)やらわん、強(し)いてぃ迄(までぃ)ん、必(かんな)じ諸(むる)、「祈祷師」ぬ言る通(とぅう)いすんでえ、どぅくだら、哀(あわ)り肝苦(ちむぐる)しいむんやいびいさ。

 やいびいしが、うぬ「ユタ半分医者半分」んでぃゆる習えん、でえじなはんたさるむぬやいびいん。何時(いち)、何時(なんどぅち)、「違たるむん」でぃち、分かやびいが。むしか、病ぬ、癌(かく)なやあに、あまくまんかい、けえ飛(とぅ)でぃから、しょう抜(ぬ)ぎてぃ、医者ぬ傍んかい、行(ん)じん、養生遅(ようじょううく)りんでえ、けんないねえ、実(じゅん)に、如何(ちゃあ)さびいが。
 
 なあ、「ユタ半分医者半分」ぬ習(なれ)え、改(あらた)みやあに、あたまから医者んかい掛(か)かゆしえ、ましえあいびらに。

【語句】
本土んじ、6歳ないる糖尿病ぬ男ん子ぬ、祈祷師なかい=本土で6歳になる男児が祈祷師によって、
インシュリン打ちゅし、止みらっさたあなかい=インシュリンを打つのを止めさせられ、
けえ亡する一件ぬあたんでぃぬ事やいびいん=死亡する事件があったとの事です。非丁寧文「~事やん」。
沖縄んじん、病、怪我そおなむぬお、「御願不足」故やんでぃち=沖縄では病気、怪我の類は(先祖に対する)「御願不足」のせいだとして、
ユタ買おいが行ちゅる人ぬ、今ちきてぃ、居せえ居いびいしが=ユタを買いに行く人が、今だにいることはいますが、非丁寧文「~居しえ居しが」。
とおないねえ、如何なユタ信じやあやてぃん、自くる考えさあに=いざとなれば、どんなユタ信奉者でも、自ら判断し、
医者ぬ傍んかい行ちゅねえする習えぬあいびいん=医者のもとに走る習慣があります。非丁寧文「~習えぬあん」。
「ユタ半分医者半分」でぃゆる習えや=「ユタ半分医者半分」という習慣が
いふぇえ、救いとぅなとおむぬやいびいん=少しは救いとなっているようです。非丁寧文「~むぬやん」。
何が何やらわん、強いてぃ迄ん、必じ諸=何が何でも、強いて迄、すべて、
「祈祷師」ぬ言る通いすんでえ、どぅくだら=「祈祷師」の言う通りにするというのは、あまりにも
哀り肝苦しいむんやいびいさ=悲惨ですよ。非丁寧文「~むんやさ」。
やいびいしが、うぬ「ユタ半分医者半分」んでぃゆる習えん=ですが、その「ユタ半分医者半分」という習慣も、非丁寧文「やしが~」。
はんたさるむぬやいびいん=危険なものです。非丁寧文「~むぬやん」。
何時、何時、「違たるむん」でぃち、分かやびいが=いつ、なんどきに、「しまった」と気づくのですか。非丁寧文「~分かゆが」。
むしか、病ぬ癌なやあに、あまくまんかい、けえ飛でぃから=もしも病気がガンで、あちこちに転移してしまってから、
しょう抜ぎてぃ、医者ぬ傍んかい、行じん=慌てふためいて、医者の所に行ったとしても、 「飛ぶん」について「転移する」という意味では『沖縄語辞典』にはありません。
養生遅りんでえ、けんないねえ、実に、如何さびいが=治療の手遅れにでもなれば、一体どうするのですか。非丁寧文「~如何すが」。
なあ、「ユタ半分医者半分」ぬ習え、改みやあに=もう、「ユタ半分医者半分」の習慣は改めて、
あたまから医者んかい掛かゆしえ、ましえあいびらに=最初から医者に掛かった方がよいのではないでしょうか。非丁寧文「~ましえあらに」。

 野球(やちゅう)ぬ節(しち)ん、うちなち、野球ましやあや、いふぃえ、寂(さび)さぬ、けえとぅるばてえ居(をぅ)らんがあらんでぃ思(うみ)やびいしが、如何(ちゃあ)でえびるが?
 野球でえや7や、何(ぬう)がやら、3ぬ倍数(べえすう)から成とおるスポーツやいびいくとぅ、まあまでぃん、我(わあ)自考(どぅうかんげ)えどぅやいびいしが、良(う)さんでえ、聖高(しいだか)さるむのおあらんがあらんでぃ思(うむ)ゆるばすんあいびいん。
 選(いら)び人数(にんず)お9人、9回迄(までぃ)ぬ攻(し)み守(まむ)い、一回なあぬアウト数や三っちゃい迄とぅなとおいびいん。
 また、選び人数ぬ出来(でぃき)ん、必(かん)なじ、3冠王(くぁんおう)とぅか、トゥリップルスリー(ホームラン30本余い、盗塁30回余い、打率3割余い)ねえし、3やいびいん。

 あんさびいねえ、何(ぬ)が何(ぬう)んでぃちゃま、3ぬ倍数やれえ、聖高さる事(くとぅ)んかいなゆがんでぃ、ふぃるまさ思ゆる人(ちゅ)ん達(ちゃあ)ん、まんどおる筈(はじ)やいびいん。

 数ぬ3(さん)んでぃしえ、まあまあでぃん、「完璧、完全、聖」んでぃゆるちむええぬある語(くとぅば)「サン」とぅ語呂(くとぅば)ぬ似ちょおくとぅどぅ、拝ん事(御願事)んかい使(ちか)あらっとおるむぬやびいる。例(たとぅ)れえ、線香ん、いいくる三本なあしなとおいびいん。重箱(じゅうばく)んかい入いゆるくぁっちいぬ供(かざ)い物(むぬ)ぬん、9個、15個んでぃち、3ぬ倍数なとおいびいん。物除きとぅしち使(ちか)ゆる「サン」ぬん「サン」やいびいん。

 うぬ「サン」や沖縄(うちなあ)びけえんやあいびらな、古代(かみぐでえ)インドのサンスクリット語(くとぅば)うとおてぃぬ「サン」、ウランダアぬ「セント(聖なる)」、中国・日本ぬ「聖」んでぃやあに、いいくる「サン」どぅやいびいせえやあ。

 やくとぅどぅ、野球や「聖高」スポーツがやらんでぃち、言ちょおるたっぺえやいびいん。
 また、やいびいしが、宇宙ぬ運行(みぐい)ん、暦(くゆみ)ん3ぬ倍数しなとおいびいん???

【語句】
野球ぬ節ん、うちなち、野球ましやあや、いふぃえ、寂さぬ=野球シーズンも終わり、野球ファンは少し、寂しくて、
けえとぅるばてえ居らんがあらんでぃ思やびいしが=ぼけっとしているのではないかと思いますが、非丁寧文「~思ゆしが」。
如何でえびるが?=いかがでしょうか?。非丁寧文「~如何やが」。
野球んでや、何がやら、3ぬ倍数から成とおるスポーツやいびいくとぅ=野球等は、どういうわけか、3の倍数から成るスポーツですので、非丁寧文「~スポーツやくとぅ」。
まあまでぃん、我自考えどぅやいびいしが、良んでえ=どこまでも、私の勝手な考えなのですが、
聖高さるむのおあらんがあらんでぃ思ゆるばすんあいびいん=聖なるスポーツなのではないかと思う時もあります。非丁寧文「~ばすんあん」。
選び人数お9人、9回迄ぬ攻み守い=選手は9人、9回までの攻防、
一回なあぬアウト数や三っちゃい迄とぅなとおいびいん=一回当たりのアウト数は3つまでとなっています。非丁寧文「~迄とぅなとおん」。
また、選び人数ぬ出来ん、必なじ、3冠王とぅか=また、選手の成績も、必ず、
トリプルスリー(ホームラン30本余い、盗塁30回余い、打率3割余い)ねえし、3やいびいん=トリプルスリー等と、3です。非丁寧文「~3やん」。
あんさびいねえ、何が何んでぃちゃま、3ぬ倍数やれえ=では、なぜ、3の倍数なら、非丁寧文「あんしいねえ~」。
聖高さる事んかいなゆがんでぃ、ふぃるまさ思ゆる人ん達ん、まんどおみせえる筈やいびいん=聖なるものになるのかと疑問に思う方々もいらしゃるでしょう。非尊敬文「~まんどおる筈」。
数ぬ3んでぃしえ、まあまあでぃん、「完璧、完全、聖」んでぃゆる=数の3というのは、どこまでも、「完璧、完全、聖(なる)」という
ちむええぬある語「サン」とぅ語呂ぬ似ちょおくとぅどぅ=意味のある語「サン」と語呂が似ているからこそ、
拝ん事(御願事)んかい使あらっとおるむぬやびいる=宗教的祈り事に使われているものなのです。非丁寧文「~むぬやいびいる」。
例れえ、線香ん、いいくる三本なあしなとおいびいん=例えば、線香もほとんど3本単位です。非丁寧文「~なとおん」。
重箱んかい入いゆるくぁっちいぬ供い物ぬん=重箱に入れて供える御馳走も、
9個、15個んでぃち、3ぬ倍数なとおいびいん=9個、15個等と3の倍数となっています。非丁寧文「~なとおん」。最近は9個では多すぎるので、7個というスモールタイプ重箱もありますが…。
物除きとぅしち使ゆる「サン」ぬん「サン」やいびいん=魔除けとして使う「サン」も「サン」です。非丁寧文「~『サン』やん」。註:「サン」は、ススキの葉等をマルク結んで(本当は十字結びという説あり)あるものをいいます。
うぬ「サン」や沖縄びけえんやあいびらな=その「サン」は沖縄だけなく、
古代インドぬサンスクリット語うとおてぃぬ「サン」、=古代インドにおけるサンスクリット語の「サン」、
ウランダアぬ「セント(聖なる)」=西欧の「セント」
中国・日本ぬ「聖」んでぃやあに、いいくる「サン」とぅ語音(くとうば)ぬ似ちょおいびいせえやあ=中国・日本の「聖」などと、大抵「サン」と語音がにていますよね。非丁寧文「~似ちょおせえやあ」。
やくとぅどぅ、野球や「聖高」スポーツがらんでぃち=そんなわけで野球は「聖なる」スポーツなのかと、
言ちょおるたっぺえやいびいん=言っている次第です。非丁寧文「~たっぺえやん」。
また、やいびいしが、宇宙ぬ運行ん、暦ん3ぬ倍数しなとおいびいん???=それにしても、宇宙の運行も暦も3の倍数でできています??? 非丁寧文「~なとおん???」。

↑このページのトップヘ